Itsasoko brisak laztanduta, eguzkiaren izpi goxotan hazita, eta mendiko ur gardenak elikatuta lortzen da zuhaitz bakoitzaren fruituan kalitate zein zapore bat eta bakarra, ale bakoitza maisulan berde bihurtzeraino.

Natura eta gizadia, biak orekan jarrita uztartzen dugu gure jarduna, elkarren menpekoak direlako; ekomenpekoak gara. Biderik jasangarriena erabilita ari gara landareok hazten, gure aurreko belaunaldiek irakatsi dizkiguten balioak aintzat hartuta. Eta lortzen den fruitu bakoitzarekin eskertu nahi diogu lurrari emandako altxorra.

Ahuakate barietateen aukeraketa ere ez da kontu hutsala izan, ezta ausaz egin, Agurtzanek eta Asierrek zorrotz aztertu dute kostako magal honetara ze barietate egokitzen den ondoen, eta zerk errespetatuko duen ingurumena egokien.

Ongizatearen aldeko apustua oinarrizko zutabea da ARTADIAren filosofian. Agurtzanek eta Asierrek, biak ala biek ulertzen dute lurra zaintzea ezinbestekoa dela gizakion elikadura jasangarria bermatzeko, eta erantzukizun eta ardura sozialagatik funtsekotzat jotzen dute natura errespetatzen duen nekazaritza praktikak egitea, alegia, produktu kimikoak ahalik eta gutxien erabilita.

ARTADIAko ahuakate landare bakoitza banan-banan zaintzen da, fruitu bakoitza bat eta bakarra delako, eta halaxe eskaini nahi diegu euskal herritarrei gertuko produktua, beti kontsumo arduratsuaren aldeko apustua eginez. Sinetsita gaude jateko eta kotsumitzeko moduak osasunean ez ezik, naturan eta tokiko ekonomia sozialean eragiten duela.

Getariako baserrian, ARTADIAko ahuakate bakoitzak Agurtzanek eta Asierrek lurrarekin duten errespetua du oinarrian, eta aleek izan nahi dute gizakiaren eta lurraren arteko lotura.